පුවත්

වර්ථමානය වනවිට ශ්‍රී ලංකාව තුළ රිය අනතුරු විශාල වශයෙන් වර්ධනය වී ඇති අතර, රිය අනතුරු මගින් දිනකට අර්ධ බෙලහීන මෙන්ම පූර්ණ බෙලහීනත්වයට පත්වන ප්‍රමාණය දිනෙන් දින වර්ධනය වී තිබේ. එමෙන්ම  ඒ තුළින් මියයන සංඛ්‍යාවද සංඛ්‍යාත්මකව වර්ධනය වී තිබේ. එබැවින්  රිය අනතුරු අවම කිරීමේ දැනුවත් කිරීම් පාසල් මට්ටමින් ආරම්භ කිරීමේ වැදගත් කම අවධාරනය කර ඇති අතර ඒ අනුව මාර්ග ආරක්ෂාව පිළිබද ජාතික සභාව, අධ්‍යාපන අමාත්‍යාංශය, ප්‍රවාහන අමාත්‍යාංශය සහ මහජන ආරක්ෂක අමාත්‍යාංශය එක්ව සෑම පාසලකම මාර්ග ආරක්ෂාව පිළිබඳ ශිෂ්‍ය සංසද පිහිටුවීමට සැලසුම් කර තිබේ.

අප්‍රේල් 03 වෙනිදා සිට ආරම්භ කෙරෙන මෙම නව වැඩසටහන තුලින් විවිධ ප්‍රායෝගික ක්‍රියාකාරකම් මත ශ්‍රේණි මට්ටමින් පාසල් සිසුන්ට මාර්ග ආරක්ෂාව පිළීබව විශේෂ දැනුමක් ලබාදීමට නියමිතව ඇත. ඊට අමතරව එම සංසද ක්‍රියාකාරකම් කෙරෙහි ශිෂ්‍ය ශිෂ්‍යාවන් තුළ උද්යෝගයක් ඇතිකිරීම සදහා ඔවුන්ට ඒ සම්බන්ධයෙන් ඇගයීමේ පදක්කම් පිරිනැමීමට ද  සැලසුම් කර ඇති අතර පියවර කිහිපයක් ඔස්සේ ජනාධිපති පදක්කම් මට්ටම දක්වා ම මෙම ඇගයීමේ ක්‍රියාවලිය සැලසුම් කර තිබේ. එසේම මෙහි සුවිශේෂීත්වය වන්නේ, රියදුරු බලපත්‍ර ලබා ගැනීමට අයදුම් කිරීමේදී මෙම ජනාධිපති පදක්කම් ලාභීන් ලිඛිත පරීක්ෂණයෙන් නිදහස් කිරීමයි.

මෙම පාසල් සංසද පිහිටුවීමට සමගාමීව අධ්‍යාපන විද්‍යා පීඨයන්හිද මාර්ග ආරක්ෂාව පිළිබඳ සංසද පිහිටුවා මේ ආකාරයෙන්ම ගුරුවරුන් දැනුවත් කිරීම් ද සිදු කිරීමට බලාපොරොත්තු වේ. මීට අමතරව ‍රිය අනතුරු සහ මාර්ග නීති සම්බන්ධව පෙර පාසල් මට්ටමින් දැනුවත් කිරීම් සිදුකිරීම සඳහා ද ඉදිරියේදී අවශ්‍ය පියවර ගැනීමට නියමිතය.

ශ්‍රී ලංකා දුම්රිය දෙපාර්තමේන්තුව සතු දුම්රිය ස්ථානවලට අදාළ ගොඩනැගිලි වාණිජමය වශයෙන් ඉතා ඉහළ වටිනාකමක් ඇති නාගරික ප්‍රදේශවලට කේන්ද්‍රගතව ඇති නමුත් එම ගොඩනැගිලි හා ඒ ආශ්‍රිතව ශ්‍රී ලංකා දුම්රිය දෙපාර්තමේන්තුව සතු ඉඩම්වල වර්තමාන පරිහරණය පිළිබඳ සලකා බැලීමේදී ඒවායේ ඇති ආර්ථිකමය විභවතාවයන් මේ දක්වා සාධනීය ලෙස භාවිතා කර නොමැති බව තහවුරු වී ඇත.

ප්‍රවාහන ක්ෂේත්‍රය නව්‍යකරණය තුළින් තිරසාර සංවර්ධනයක් කරා යන ගමන්මගේ සුවිශේෂි හැරවුම් ලක්ෂයක් සනිටුහන් කරමින්, කොළඹ නගරය ආශ්‍රිතව දුම්රිය ස්ථාන පිහිටි භූමිය හා ගොඩනැගිලි වාණිජ මධ්‍යස්ථාන වශයෙන් වැඩි දියුණු කිරීමේ ඉහළ විභවතාවයක් පවතී. එබැවින් රාජ්‍ය පුද්ගලික හවුල්කාරීත්වය යටතේ එකී ගොඩනැගිලි වැඩිදියුණු කිරීමට සුදුසු ක්‍රමවේදයක්ද සහිතව ඒකාබද්ධ යෝජනාවක් ලෙස නාගරික සංවර්ධන අධිකාරිය, ශ්‍රී ලංකා දුම්රිය දෙපාර්තමේන්තුව හා අදාළ පාර්ශවකාර ආයතනද අමාත්‍ය මණ්ඩලය වෙත කරන ලද යෝජනාවට අනුමැතිය ලද අතර ඒ අනුව ඉහත සඳහන් කල පැරණි දුම්රිය ස්ථානයන් නවීකරණයට ලක්කොට, වානිජ මධ්‍යස්ථාන බවට පත්කිරීම සඳහා ප්‍රවාහන හා මහාමාර්ග අමාත්‍යාංශය විසින් නව ක්‍රමවේදයක් සකස් කෙරේ.

වැල්ලවත්ත, බම්බලපිටිය, කොල්ලූපිටිය දෙහිවල, ගල්කිස්ස, සහ කොම්පඤ්ඤ වීදිය යන දුම්රිය ස්ථාන  6 මෙම ව්‍යාපෘතියේ මූලික අදියර සඳහා යෝජනා වී ඇත. මීට අමතරව ආයෝජකයන් කැමැත්ත පළකරනු ලබන වෙනත් දුම්රිය ස්ථාන වේනම් ඒ පිළිබඳවද  ප්‍රවාහන හා මහාමාර්ග අමාත්‍යාංශය විසින් සලකා බලනු ලබයි.

රාජ්‍ය අංශය සතු මූලික වගකීම යටිතල පහසුකම් සංවර්ධනය කිරීම වුවද එය ව්‍යාපාරික මුහුණුවරකින් සිදුකිරීම තුලින් යටිතල පහසුකම් සංවර්ධනයට සමගාමීව මූල්‍යමය ප්‍රතිලාභයක්ද හිමිකර ගැනීම මෙම නව ව්‍යාපෘතියේ විශේෂත්වයයි. එමෙන්ම ප්‍රතිනිර්මාණය වන දුම්රිය ස්ථානයන්හි බහුවිධ අවශ්‍යතා  සපුරාලමින්, ජනතාවට සුභෝපභෝගී ජීවන රටාවකට අනුගත වියහැකි පරිදි පහසුකම් මෙන්ම වානිජ කාර්යයන් සඳහාද පහසුකම් ලබාදීමද අපේක්ෂා කෙරේ. තවද, මෙම ව්‍යාපෘතියේ වක්‍ර ප්‍රතිලාභයක් ලෙස නගර අලංකරණය  සිදුවන අතර ඒ තුලින් දේශීය සහ විදේශීය සංචාරක ආකර්ශනය වැඩිවන අතර එමඟින් සංචාරක ක්ෂේත්‍රයේ ප්‍රවර්ධනයට ලැබෙන දායකත්වය අතිවිශාලය.

ඒසඳහා තම අභිලාශයන් ප්‍රකාශකිරීම සඳහා දේශීය මෙන්ම විදේශීය ආයෝජකයන්ට අවස්ථාව සලසාදීම සඳහා ප්‍රවාහන හා මහාමාර්ග අමාත්‍යාංශය විසින් විවෘත ආරාධනයක් කර සිටී. 2024 අප්‍රේල් 01 දින සිට www.transport.gov.lk වෙබ් අඩවිය තුළින් මෙම ව්‍යාපෘතිය පිළිබඳ  සවිස්තරාත්මක තොරතුරු, මාර්ගෝපදේශයන් ආයෝජකයන්ට/ මහජනතාවට ලබාදීමට නියමිතය.

ශ්‍රී ලංකාව තුල දෛනිකව සිදුවන්නාවූ මරණ වලින් විශාල ප්‍රතිශතයක් මාර්ග අනතුරු හේතුවෙන් සිදුවන අතර රියදුරන්ගේ නොසැලකිලිමත් බව මෙන්ම අපරික්ෂාකාරි බව මේ සඳහා මූලිකම හේතු ලෙස දැක්විය හැක. මෙසේ සිදුවන්නාවූ බස් රථ අනතුරු වළක්වා ගැනීම සදහා ප්‍රවාහන හා මහාමාර්ග අමාත්‍යාංශය සහ ජාතික ගමනාගමන කොමිෂන් සභාව එක්ව නව ක්‍රමවේදයක් දියත් කිරීමට සැලසුම් කර තිබේ.

ඒ අනුව, මාර්ගයන්හි ධාවනයවන බස් රථවල ධාවනයේ ගුණාත්මකබව, අඩුපාඩු, අපරීක්ෂාකාරි ධාවනය ආදිය හේතුවෙන් මහජනාව දෛනිකව මුහුණ දෙන්නාවූ පීඩාකාරී තත්ත්වයන් සම්බන්ධයෙන් ක්ෂණිකව අදාළ ආයතන දැනුවත් කිරීමේ ක්‍රමවේදයක් සකසා ඇත.

එම ක්‍රමවේදයට අනුව මගී ජනතාවට මුහුණපැමට වන දුෂ්කරතා සම්බන්ධයෙන් දුරකතන, ෆැක්ස්, ඉමේල්, whatsapp  හෝ ලිපි මගින් ජාතික ගමනාගමන කොමිෂන් සභාව  දැනුවත් කිරීමේ හැකියාව සලසා තිබේ. එම පැමිණිළි අනුව ක්‍රියාත්මකවී, මගී ජනතාවට සිදුවන අපහසුතා මගහරවා, ඔවුනට ආරක්ෂාකාරී, සුවපහසු ප්‍රවාහන පද්ධතියක් සකස් කරදීම, ප්‍රවාහන හා මහාමාර්ග අමාත්‍යාංශය ප්‍රමුඛ ජාතික ගමනාගමන කොමිෂන් සභාවේ අරමුණ වේ.

ඒ අනුව ක්ෂණික ඇමතුම් 1955 / whatsapp 0712595555 / ඉ මේල් This email address is being protected from spambots. You need JavaScript enabled to view it. / ෆැක්ස් 0112503725, 0112058138 හෝ ජාතික ගමනාගමන කොමිෂන් සභාව, අංක 241, උද්‍යාන පාර, කොළඹ 05 යන ලිපිනයට බස් මගීන්ගේ පැමිණිලි යොමු කිරීමට අවස්ථාව සලසා තිබේ.

අනාරක්ෂිත හා නොසැලකිලිමත් බස් රථ ධාවනයන් ජනතාවට අත්වන පීඩාවන් ඉහත ආකාරයෙන් ජාතික ගමනාගමන කොමිෂන් සභාව වෙත යොමු කිරීමෙන් එම පීඩාකාරී තත්ත්වයන් සම්බන්ධයෙන් ක්‍රියාත්මකවී, ඒ සඳහා නිසි පියවර ගන්නා බවත්, ඒ අනුව ජාතික සත්කාරයක් සේ සලකා මෙම ක්‍රියාවලියට සහාය දක්වන ලෙසත්, ප්‍රවාහන හා මහාමාර්ග අමාත්‍යාංශය සහ ජාතික ගමනාගමන කොමිෂන් සභාව මගී ජනතාවගෙන් කාරුණිකව ඉල්ලා සිටී.

මගී අවශ්‍යතාවය මත තාවකාලිකව වෙනත් මාර්ග සඳහා අනුයුක්ත කළ ජාතික ගමනාගමන කොමිෂන් සභාවේ අනුමත ස්ථිර මාර්ග බලපත්‍ර
එසේ අනුයුක්ත කරන ලද මාර්ගයට ස්ථිර කර ලබාදී ඇත.

පසුගිය සමය තුළ ජාතික ගමනාගමන කොමිෂන් සභාව යටතේ ස්ථිර මාර්ග බලපත්‍ර හිමි පිරිසකගේ බලපත්‍ර මගී අවශ්‍යතාවයන් උදෙසා තාවකාලිකව වෙනත් මාර්ග සඳහා සංශෝධනය කර තිබේ. එලෙස තාවකාලිකව ලබා දුන් මාර්ග බලපත්‍ර අධිකරණය විසින් ලබා දුන් නියෝගයකට අනුව නියමිත තාක්ෂණික අගයන් අයකර සංශෝධිත මාර්ගයේ ස්ථීර බලපත්‍ර බවට පත්කර පිරිනැමීම ගරු ප්‍රවාහන මහාමාර්ග හා ජනමාධ්‍ය අමාත්‍ය, ආචාර්ය බන්දුල ගුණවර්ධන මහතාගේ ප්‍රධානත්වයෙන් මාර්තු 14 දින අමාත්‍යයංශ ශ්‍රවණාගාරයේදී සිදු කරන ලදී.

මේ වන විට රට තුළ මගී ප්‍රවාහන බස් රථවල අතිරික්තයක් පවතින අතර ජනතාව ක්‍රමක්‍රමයෙන් මගී ප්‍රවාහන බස් රථ භාවිතයෙන් ඈත්වීමක් ද දක්නට ලැබෙන බවත් මේ තත්ත්වය නිවැරදි කර ගනිමින් මගී ජනතාවට වඩාත් සමීප සේවාවක් ලබා දෙමින් මගී ප්‍රවාහන සේවාවන් සාර්ථකව ක්‍රියාත්මක කිරීම සඳහා සියලු දෙනා එක්ව දායක විය යුතු බව ගරු ප්‍රවාහන රාජ්‍ය අමාත්‍ය, ලසන්ත අලගියවන්න මහතා මේ අවස්ථාවේදී ප්‍රකාශ කළේය. එසේම අත්‍යවශ්‍යම තත්ත්වයක් යටතේ මිස වෙනත් කිසිදු හේතුවක් මත ඉදිරියේදී නව මාර්ග බලපත්‍ර ලබාදීමක් සිදු නොවන අතර විධිමත් ඒකාබද්ධ කාලසටහන් ක්‍රමයක් ඔස්සේ බස් රථ ධාවනය කිරීමට නියමිත වේ.

ගරු ප්‍රවාහන රාජ්‍ය අමාත්‍ය, ලසන්ත අලගියවන්න මහතා, ප්‍රවාහන හා මහාමාර්ග අමාත්‍යංශ ලේකම්, ඉංජිනේරු රංජිත් ගංගානාත් රූබසිංහ මහතා ඇතුළු අමාත්‍යංශයේ අතිරේක ලේකම්වරුන්, ජාතික ගමනාගමන කොමිෂන් සභාවේ සභාපති, ශෂී වෙල්ගම මහතා ඇතුළු එම ආයතනයේ නිලධාරීන්, බලපත්‍ර ලාභීන් ඇතුළු පිරිසක් මෙම අවස්ථාව සඳහා එක්ව සිටියහ.