පුවත්

විදුලියට පරිවර්තනය කරන ත්‍රීරෝද රථ සහ මෝටර් රථවලට අවශ්‍ය ආරෝපණ පහසුකම් ලබාදීම සහ ත්‍රීරෝද රථ විදුලියට පරිවර්තනය කිරීමේ මධ්‍යස්ථානයක් ප්‍රවාහන මහාමාර්ග හා ජනමාධ්‍ය අමාත්‍ය ආචාර්ය බන්දුල ගුණවර්ධන මහතාගේ සුරතින් විවෘත විය.

වේගා ඉනෝවෙටිව් ආයතනය විසින් කොල්ලුපිටිය ප්‍රදේශයේ 2024-03-14 දින ස්ථාපිත කල මෙම මධ්‍යස්ථානය මගින් කෙටි කාලයක් තුළ අඩු ධාරිතාවයකින් යුතු යතුරුපැදි, ත්‍රීරෝද රථ සහ අනෙකුත් විදුලි වාහන ආරෝපණය කළ හැකි ආරෝපණ පහසුකම් ස්ථාපනය කර ඇති අතර ඒ තුළින් පැයකට වඩා අඩු කාලයකදී ත්‍රීරෝද රථයක් සම්පූර්ණයෙන්ම ආරෝපණය කළ හැකි වේ. කිසිදු මුදල් භාවිතයකින් තොරව ජංගම දුරකථන යෙදවුමක් හරහා මෙම ස්ථානයේදී ත්‍රීරෝද රථ ඇතුළු වාහන ආරෝපණය කිරීම සහ ඊට අදාළ මුදල් ගෙවීම ඇතුළු කටයුතු සිදු කර ගැනීමේ තාක්ෂණික පහසුකම් ද පරිභෝගිකයින් වෙත සලසා තිබේ. ඉදිරියේදී දිවයින පුරා සියලු ආරෝපණ මධ්‍යස්ථාන වලට මෙම පහසුකම් ලබාදීම සඳහා වේගා ඉනෝවෙටිව් ආයතනය විසින් කටයුතු සැලසුම් කර ඇති බව පවසයි.

එමෙන්ම දැනට ඉන්ධන භාවිතයෙන් ධාවනය වන ත්‍රීරෝද රථ විදුලියට පරිවර්තනය කිරීම සඳහා CDB ආයතනය සමඟ එක්ව පහසු මුල්‍ය පහසුකම් ලබාදීමේ කාර්යාලයක්‌ ද මෙම පරිශ්‍රයේදී ක්‍රියාත්මක කර තිබේ. ඒ යටතේ ඕනෑම පාරිභෝගිකයකුට මෙම ස්ථානයට පැමිණ අවශ්‍ය මූල්‍ය පහසුකම් ලබාගෙන තම ත්‍රීරෝද රථය කෙටි කාලයක් තුල විදුලියට පරිවර්තනය කරගැනීමේ පහසුව හිමිවනු ඇත.

වේගා ඉනොවේටිව් සමාගමේ නිර්මාතෘ, ප්‍රධාන විධායක නිලධාරී ආචාර්ය හර්ෂ සුභසිංහ මහතා, ශ්‍රී ලංකා ගුවන්විදුලි සංස්ථාවේ සභාපති, මෝටර් රථ ප්‍රවාහන කොමසාරිස් දෙපාර්තමේන්තුවේ නිලධාරින්, CDB මූල්‍ය ආයතනයේ ප්‍රධාන විධායක නිලධාරී ඇතුළු නිලධාරීන්, ඇතුළු පිරිසක් මෙම අවස්ථාව සඳහා එක්ව සිටියහ.

ලංකා ඉතිහාසයේ ප්‍රථම වතාවට ප්‍රවාහන හා මහාමාර්ග අමාත්‍යාංශය යටතේ පවතින මෝටර් රථ ප්‍රවාහන දෙපාර්තමේන්තුව සහ ප්‍රවාහන වෛද්‍ය ආයතනය, සිය සේවාලාභීන් සදහා සියලුම සේවාවන් ලබාදීමේ අදාල දිනයන් හා වේලාවන් වෙන්කර ගැනීම් ඩිජිටල්කරණය කරයි.

ඒ අනුව 2024 මාර්තු 04 දින සිට සිය සේවාලාභීන්හට අදාල ආයතන වෙත නොගොස්, ස්වයංක්‍රීය දුරකතන පද්ධතියක් යටතේ සහ වෙබ් අඩවිය වෙත පිවිස සිය අවශ්‍යතා සඳහා  සේවා ස්ථානය,  දිනයක් සහ වේලාවක් වෙන්කරවා ගත හැකි බව, 2024 ‍පෙබරවාරි 29 පෙරවරුවේ පැවැති ප්‍රවෘත්ති සාකච්ඡාවකට සහභාගී වෙමින්, ප්‍රවාහන හා මහාමාර්ග අමාත්‍ය ආචාර්ය බන්දුල ගුණවර්ධන මහතා පැවසීය.

මෝටර් රථ ප්‍රවාහන දෙපාර්තමේන්තුව සහ ප්‍රවාහන වෛද්‍ය ආයතනය මෙම ඩිජිටල්කරණය කිරීම පිළිබඳව මාධ්‍ය දැනුවත් කිරීම සඳහා රජයේ ප්‍රවෘත්ති දෙපාර්තමේන්තු ශ්‍රවණාගාරයේ පැවැති මෙම ප්‍රවෘත්ති සාකච්ඡාවට, ප්‍රවාහන හා මහාමාර්ග අමාත්‍යාංශ ලේකම් ඉංජිනේරු රංජිත් ගංගානාත් රූබසිංහ, අමාත්‍යාංශ අතිරේක ලේකම් තුෂාර සුරවීර, මෝටර් රථ ප්‍රවාහන කොමසාරිස් නිශාන්ත අනුරුද්ධ වීරසිංහ සහ ජාතික ප්‍රවාහන වෛද්‍ය ආයතනයේ සභාපති දර්ශන අබේරත්න යන මහත්වරුන් සහභාගී වූහ.

රජයට අදායම් ලබාදෙන ප්‍රධානතම ආයතන යටතට ගැනෙන මෝටර් රථ ප්‍රවාහන දෙපාර්තමේන්තුව ජාතික ආර්ථිකයට සපයන දායකත්ව අති විශාල වේ. එසේම එතුළින් දෛනිකව රියදුරු බලපත් ලබාගැනීම, වාහන ලියාපදිංචිය වැනි අවශ්‍යතා සපුරා ගන්නා සේවාදායක ප්‍රමාණයද අතිවිශාල වේ. මෙවැනි ආයතනයක් තුල පවතින අධික තදබදයට ස්ථිරසාර විසඳුමක් වශයෙන්, දිවයිනේ දිස්ත්‍රික්ක 25 තුලම පිහිටා ඇති ශාඛා කාර්යාලද ආවරණය වන පරිද්දෙන් ක්‍රියාත්මක කෙරෙන මෙම මාර්ගගත වේලාවන් වෙන්කර ගැනීමේ ක්‍රියාවලිය යටතේ, ඉතාමත් කාර්යක්ෂම, ඵලදායී මෙන්ම වඩාත් විනිවිදභාවයෙන් යුත් සේවයක් ලබාගැනීමට සේවාදායකයින්ට අවස්ථාව සැලසෙනු ඇත.

ඒ අනුව  ස්වයංක්‍රීය දුරකථන අංක 011 2117116 යටතේ භාෂා ත්‍රිත්වයෙන්ම මෙම සේවය ලබාගැනීමට අවස්ථාව සලසා ඇති අතර ඊට අමතරව www.dmtappoinments.dmt.gov.lk වෙබ් අඩවිය තුළින්ද සේවාදායකයින්හට දිනයක් සහ වේලාවක් වෙන්කර ගැනීමට හැක.

මීට සමගාමීව ජාතික ප්‍රවාහන වෛද්‍ය ආයතනයේ වේරහැර ශාඛාවේදීද රියදුරු බලපත්‍රයට අවශ්‍යවන වෛද්‍ය සහතිකය ලබාගැනීමේදී ඇතිවන අපහසුතා මගහරවා කාර්යක්ෂම හා ගුණාත්මක සේවාවක් ලබාගැනීමට 2024 මාර්තු මස 04 දින සිට නව ක්‍රමවේදයක් හඳුන්වාදී තිබේ. ඒ අනුව e -channeling පහසුකම් යටතේ ඕනෑම ජංගම දුරකතනයක් මගින් 225 හෝ SLT ස්ථාවර දුරකතන මගින් 1225 ඇමතීම තුළින් හෝ e channeling ජංගම යෙදවුම හෝ වෙබ් අඩවිය හෝ www.ntmi.lk වෙබ් අඩවියට පිවිසීම මගින් වෛද්‍ය සහතික ලබාගැනීම සඳහාද  දිනයක් හා වේලාවක් වෙන්කර ගැනීමේ පහසුකම් සේවාලාභීන්ට සලසා තිබේ.

මෙම ක්‍රමය ක්‍රියාත්මක වීමත් සමගින් ජාතික ප්‍රවාහන වෛද්‍ය ආයතනයේ  වේරහැර ශාඛාවේ සියලුම වෛද්‍ය සහතික අයදුම් කිරීමේ කටයුතු මෙම ආකාරයට පමණක් ක්‍රියාත්මක වනු ඇත.

අලි - දුම්රිය ගැටුම අවම කිරීමේ ජාතික ක්‍රියාන්විතයේ පළමු පියවර වශයෙන්, මෙරට ප්‍රථම වරට දුම්රිය මාර්ගයට යටින් ඉදිකරනු ලබන වනජීවී උමං මාර්ගයේ ඉදිකිරීම්, ප්‍රවාහන, මහාමාර්ග හා ජනමාධ්‍ය අමාත්‍ය ආචාර්ය බන්දුල ගුණවර්ධන මහතාගේ ප්‍රධානත්වයෙන් ගල්ගමුව-ගැටදිවුල-කාසිකොටේ දී 2024 මාර්තු 01 ආරම්භ කෙරිණි.

අමාත්‍ය ආචාර්ය බන්දුල ගුණවර්ධන මහතාගේ උපදෙස් පරිදි ප්‍රවාහන හා මහාමාර්ග අමාත්‍යාංශය, ශ්‍රී ලංකා දුම්රිය දෙපාර්තමේන්තුව, සුරකිමු දුම්රිය ජාතික ව්‍යාපාරය ඇතුළු ආයතන සහ සංවිධාන සමඟ පැවති සාකච්ඡා කිහිපයකින් අනතුරුව වනඅලින් මෙම දුම්රිය මාර්ගය හරහා ගමන් කිරීමේදී අනතුරට පත්වීම වැළැක්වීම සඳහා මෙම විශේෂ පියවර ගෙන තිබේ.
මෙම වනජීවී උමං මාර්ගය ඉන්දියානු ණය ආධාර යටතේ සිදු කෙරෙන මහව - ඕමන්තේ දුම්රිය මාර්ග ප්‍රතිසංස්කරණ ව්‍යාපෘතිය යටතේ ඉදි කිරීමට ප්‍රතිපත්තිමය තීරණයක් ගත් අතර, මෙලෙස එහි ඉදිකිරීම් කටයුතු අද නිල වශයෙන් ආරම්භ කරන ලදී.

පිරිස අමතා අදහස් දැක්වූ අමාත්‍ය ආචාර්ය බන්දුල ගුණවර්ධන මහතා,
" මේ රටේ අනාගතය, පරිසරය, පරිසරය සුරැකීමේ වැදගත්කම යනාදී කරුණු පිළිබඳව සුරකිමු ශ්‍රී ලංකා සංවිධානය ආදී පරිසර සංවිධාන විවිධ ආකාරයේ ක්‍රමවේද යටතේ දිගටම හඬ නගමින් සිටිනවා. නමුත් විවිධ හේතු මත එම කටයුතු ප්‍රායෝගිකව ක්‍රියාත්මක කිරීමට බාධා මතු වනවා. නමුත් පාහියන්ගල ආනන්ද ස්වාමීන් වහන්සේ ඇතුළු පරිසර සංවිධාන නියෝජිතයින් අප මුණගැසුණු අවස්ථාවේදී උද්ඝෝෂණ ආදී ක්‍රියා මාර්ගයන් ගෙන් තොරව පවතින ගැටලු පිළිබඳ අවධානය යොමු කර අපට සිදු කළ හැකි සෑම ක්‍රියාමාර්ගයක්ම ගැනීම පිළිබඳව අමාත්‍යංශයක් ලෙස ලබාදිය හැකි උපරිම දායකත්වය දීමට පොරොන්දුවක් ලබා දුන්නා. නමුත් එවැනි තත්වයන් පිලිබඳ රටේ පවතින සාම්ප්‍රදායික දෙපාර්තමේන්තු ක්‍රමවේද යටතේ ක්‍රියාමාර්ග ගැනීමට නිලධාරීන්ට හැකියාවක් නැහැ. පුරා වසර හැත්තෑ හයක් අපි විවිධ කමිටු පිහිටුවමින් ප්‍රශ්නවලට විසඳුම් සෙවීමට උත්සාහ දරා තිබෙනවා. එහි ප්‍රතිපලයක් ලෙස රටේ බිහිවූ කිසිඳු රජයකට එදිනෙදා පවත්වාගෙන යෑමට ප්‍රමාණවත් ආදායමක් ලැබී නැහැ. සියල්ලක් මත අපි සියලු දෙනාම ගත යුතු සංඛ්‍යාත්මක සත්‍ය වන්නේ කවර රජයක් යටතේ වුවත්, කවර ජනාධිපතිවරයෙකු යටතේ වුවත් සියලු සංවර්ධන කටයුතු සිදු කර තිබෙන්නේ දේශීය සහ විදේශීය වශයෙන් ණය ලබා ගැනීම තුළින් බවයි.

දිගින් දිගටම එලෙස ලබාගත් ණය නොගෙවීම මත මේ වන විට රටක් ලෙස අප දැවැන්ත අර්බුදකාරී තත්ත්වයකට මුහුණ දී තිබෙනවා.එම තත්ත්වය යටතේ වුවත් මෙම දුම්රිය මාර්ග නවීකරණ ව්‍යාපෘතියට ඉන්දියානු ණය යෝජනා ක්‍රමය යටතේ රුපියල් කෝටි 3000ක මුදලක් ලබාදී තිබෙනවා. නමුත් 2014 වසරේ සිට අමාත්‍යවරු හත් දෙනෙකු මීට පෙර ප්‍රවාහන විෂයභාරව කටයුතු කලත් ඒ කිසිම අයෙකුට ව්‍යාපෘතිය ආරම්භ කිරීමට හැකියාවක් ලැබුණේ නැහැ. ඊට හේතු වූයේ දුම්රිය මාර්ගය නවීකරණය සඳහා මාස හය හතක් මාර්ගය ගලවා තිබීම හේතුවෙන් මහජන විරෝධයක් මතුවී තමන්ට ලැබෙන ඡන්ද ප්‍රමාණය අඩු වනු ඇති බවට බොහෝ දෙනෙකු බිය වීමයි. නමුත් අමාත්‍යවරයෙකු ලෙස මම තීරණ ගැනීමට විය වන්නේ නැහැ. එම නිසා මෙම උතුරු දුම්රිය මාර්ගය නවීකරණය කිරීමේ පළමු අදියර ලෙස අනුරාධපුර සිට ඕමන්ත දක්වා දුම්රිය මාර්ගය මාස පහක් තුළ පැයට කිලෝමීටර් 100ක වේගයෙන් දුම්රිය ගමන් කළ හැකි ආකාරයට නවීකරණය කොට අවසන් කළා. මහව සිට අනුරාධපුර දක්වා එහි දෙවන අදියර ද එළඹෙන පොසොන් පෝයට පෙර ඉදිකිරීම් අවසන් කිරීමට අප කටයුතු කරනවා. එවිට වසර 110 කට පසු පැයට කිලෝමීටර් සීයක වේගයෙන් යාපනයේ සිට ගමන් කිරීමේ අවස්ථාව මගී ජනතාවට හිමි වනවා. ඒ අනුව යාපනයේ සිට කොළඹට ගමන් කිරීමට ගතවන කාලය පැය පහ හමාරක් දක්වා අඩුවනු ඇති. රට ඉතාමත් අපහසු තත්ත්වයක තිබියදී වුවත් ණය වශයෙන් ලබා ගන්නා මුදලින් හෝ මිනිස් ජීවිත මෙන්ම සත්ව ජීවිතද ආරක්ෂා කර ගැනීමේ උදාර අරමුණින් මෙන්ම ප්‍රදේශයේ ජනතාවගේ ජීවන තත්ත්වය යහපත් කිරීමට සඳහා යොදා ගැනීමට හැකිවීම පිළිබඳව මා සතුටු වනවා යැයි පැවසීය.

ජාතික සංඝ සම්මේලනයේ ලේකම් කට්ටකඩුවේ සුමනරතන නාහිමි, සුරකිමු ශ්‍රී ලංකා පදනමේ සභාපති පාහියංගල ආනන්ද සාගර හිමියන් ඇතුළු මහා සංඝරත්නය, ප්‍රවාහන හා මහාමාර්ග අමාත්‍යාංශයේ ලේකම් ඉංජිනේරු රංජිත් රූබසිංහ මහතා, පාර්ලිමේන්තු මන්ත්‍රීවරුන් වන යූ. කේ. සුමිත් උඩුකුඹුර මහතා, ඉෂාක් රහුමාන් මහතා, දුම්රිය සාමාන්‍යාධිකාරී එච්. එම්. කේ. ඩබ්. බණ්ඩාර මහතා ඇතුළු නිලධාරීන්, ඉදිකිරීම් භාර ඉන්දීය ඉර්කොන් සමාගමේ නියෝජිතයින්, CECB ආයතනයේ ප්‍රධානීන් ඇතුළු නිලධාරින්, සුරකිමු ශ්‍රී ලංකා පදනමේ සාමාජිකයින්, පරිසර සංවිධාන නියෝජිතයින්, අඹන්පොල ප්‍රාදේශීය ලේකම්තුමිය ඇතුළු රාජ්‍ය නිලධාරීන්, ප්‍රදේශවාසීන් ඇතුළු විශාල පිරිසක් මෙම අවස්ථාවට එක්ව සිටියහ.

දිනෙන් දින වර්ධනය වන අලි - දුම්රිය ගැටළුවට විසඳුමක් වශයෙන්, ශ්‍රී ලංකාවේ පළමු වනජීවී උමං මර්ගයේ ඉදිකිරීම් කටයුතු,ප්‍රවාහන හා මහාමාර්ග අමාත්‍යාංශයේ අධීක්ෂණය යටතේ,  2024 මාර්තු මස 01 දින ගල්ගමුව,ගැටදිවුල, කාසිකොටේදී ආරම්භ වේ.

දුම්රියන්හි හැපී මියයන අලි ඇතුන් සංඛ්‍යාව දිනෙන් දින වර්ධනය වන අතර, එය ජාතික මෙන්ම ජාත්‍යන්තර මට්ටමේ අවධානය යොමුවී ඇති පාරිසරික සහ සංවර්ධන ගැටළුවක් බවට පත්ව තිබේ. ඒ සඳහා විවිධ රාජ්‍ය සහ රාජ්‍ය නොවන පාර්ශව ගණනාවක් දීර්ඝ කාලයක් පුරාවට විසඳුම් ‍රැසක් යෝජනා කර ක්‍රියාත්මක කර ඇති නමුත්,  දුම්රියන්හි අලි ඇතුන් ගැටීම වළක්වා ගැනීමට රටක් වශයෙන් තවමත් අප උත්සහ කරමින් සිටියි.

ප්‍රවාහන හා මහාමාර්ග අමාත්‍යාංශය, ශ්‍රී ලංකා දුම්රිය දෙපාර්තමේන්තුව, "සුරකිමු දුම්රිය" ජාතික ව්‍යාපාරය ඇතුළු ආයතන සහ සංවිධාන සමඟ සාකච්ඡා පවත්වමින් මේ පිළිබඳව දීර්ඝ ලෙස කරුණු අධ්‍යයනය කර,"සුරකිමු ශ්‍රී ලංකා" සංවිධානය අලි - දුම්රිය ගැ‍ටුම් වැළැක්වීම උදෙසා යෝජනා ‍රැසක් රජයට ඉදිරිපත් කරන ලදි. ඒ අතුරින් ප්‍රධාන යෝජනාවක් වූයේ, පසුගිය වසර කිහිපය තුල දුම්රියන්හි ගැටීම නිසා වැඩිම වන අලි ප්‍රමාණයක් මිය ගිය සහ වන අලි 150-200 ත් අතර ප්‍රමාණයක් නිරන්තරයෙන් දුම්රිය මාර්ගය ආශ්‍රිතව සැරිසරන, අඹන්පොල හා ගල්ගමුව දුම්රිය ස්ථාන අතර පිහිටි කාසිකොටේ, ගැටදිවුල යන ස්ථානයේ දුම්රිය මාර්ගයට යටින් වනජීවී උමං මාර්ගයක් ඉදිකර දෙන ලෙස වූ යෝජනාවය.එහිදී එම ස්ථානයට නුදුරින් පවතින පැරණි බෝක්කුවක් වනජීවී උමං මාර්ගයක් වශයෙන් සංවර්ධනය කිරීමට යෝජනා වුවද එහි පවතින තාක්ෂණික ගැටළු කිහිපයක් නිසා අලිමංකඩ ස්ථානයේ නව වනජීවි උමඟක් ඉදිකිරීමට යෝජනා විය.

ඒ අනුව එහිදී අලි - දුම්රිය ගැටුම වළකන ජාතික ක්‍රියාන්විතයේ පළමු පියවර වශයෙන් යෝජිත වනජීවී උමං මාර්ගය ඉන්දියානු ණය ආධාර යටතේ සිදු කෙරෙන මහව - ඕමන්තේ දුම්රිය මාර්ග ප්‍රතිසංස්කරණ ව්‍යාපෘතිය යටතේ ඉදිකිරීමට ප්‍රතිපත්තිමය තීරණයක් ගත් අතර එම තීරණය ක්‍රියාවට නැංවීම  සඳහා අවශ්‍ය  කටයුතු සම්පාදනය කරන ලදී. වන අලි 200කගේ පමණ ජීවිත සුරක්ෂිත කෙරෙන මෙම කටයුත්ත ශ්‍රී ලංකාවේ වනජීවී සංරක්ෂණය වෙනුවෙන් ගන්නා ලද ප්‍රශංසනීය පියවරකි. ඊට අමතරව දුම්රිය අනතුරු වළක්වා, දුම්රිය දේපළ ආරක්ෂා කර ගැනීමටත්, දුම්රිය මගීන්ගේ ආරක්ෂාව තහවුරු කිරීමටත් මෙම ව්‍යාපෘතිය විශාල දායකත්වයක් ලබාදෙයි.

මෙම ජාතික ක්‍රියාන්විතයේ සමාරම්භක අවස්ථාවට ප්‍රවාහන හා මහාමාර්ග අමාත්‍ය, ආචාර්ය බන්ධුල ගුණවර්ධන මහතා, අමාත්‍යාංශ ලේකම් ඉංජිනේරු රංජිත් ගංගානාත් රුබසිංහ මහතා ඇතුළු අමාත්‍යාංශයේ හා ඊට අනුබද්ධිත ආයතනයන්හි ජ්‍යේෂ්ඨ නිලධාරීන් විශාල පිරිසක් ද සහභාගී විමට නියමිතය.